MKURUGENZI HANANG AONGOZA UPANDAJI MITI ENEO LA UJENZI WA JENGO JIPYA LA UTAWALA.

Posted on: January 29th, 2025

Mkurugenzi Mtendaji wa Halmashauri ya Wilaya ya Hanang, Teresia Irafay, jana Januari 28, 2025 aliongoza zoezi la upandaji miti katika eneo litakapojengwa jengo jipya la utawala katika kitongoji cha Hombap, akisisitiza kuwa jengo hilo litakuwa alama muhimu ya maendeleo ya wilaya.

Katika hotuba yake baada ya tukio hilo, Irafay amesema kuwa miti iliyopandwa itasaidia kuimarisha mandhari ya jengo hilo, ambalo linatarajiwa kuwa kitovu cha utawala wa wilaya na kutoa wito kwa wananchi kutovamia eneo hilo kwa shughuli za kilimo au matumizi mengine yasiyo rasmi, huku akimtaka Afisa Mtendaji wa Mamlaka ya Mji Mdogo wa Katesh, kuhakikisha eneo hilo linalindwa kwa uangalifu mkubwa.

Mbali na eneo la jengo jipya la utawala, upandaji miti umefanyika pia kwenye maeneo mengine ya Katesh, ikiwa ni pamoja na barabara ya Singida kuanzia Hospitali ya Wilaya, Tumaini hadi eneo la Machakos, hatua inayolenga kuboresha taswira ya mji wa Katesh na kuhakikisha mazingira yake yanabaki rafiki katika kukabiliana na tabia nchi.

Zoezi la upandaji miti limeendelea kuwa ajenda ya msingi katika Wilaya ya Hanang, ambapo wananchi wameonesha mwitikio mkubwa kwa kushiriki katika juhudi hizi kwa kupanda miti katika maeneo yao.